Gjallërimi i Frymës së Shenjtë
6. gusht e enjte
“Më gjallëro sipas fjalës sate” Psalmi 119:25
Bibla është menduar të lexohet me lutje, të meditohet dhe të jetohet në praktikë. Çelësi është gjallërimi që vjen nga Fryma e Shenjtë. “Dhe në qoftë se Fryma i atij që ringjalli Krishtin prej së vdekurish banon në ju, ai që e ringjalli Krishtin prej së vdekurish do t'u japë jetë edhe trupave tuaj vdekatarë me anë të Frymës së tij që banon në ju” (Romakëve 8:11). Në këtë rast, fjala “gjallërim” i referohet ringjalljes sonë trupore nga të vdekurit. Por Fryma e Shenjtë na gjallëron në më shumë se një mënyrë. Ndonjëherë është një ide e dhënë nga Perëndia që ndizet menjëherë në mendjen tonë. Ndonjëherë është një nxitje për të bërë një hap përpara, për t’u përfshirë ose për të dalë me besim. Ndonjëherë është një fjalë urtësie në një situatë të vështirë. Kur Fryma e Shenjtë të gjallëron në këtë mënyrë, mos hezito. Vepro sipas idesë, shfrytëzo mundësinë dhe shpall Fjalën.
Fjala “gjallëroj” ka disa kuptime. Le të shohim tre prej tyre: (1) “Të gjallërosh” do të thotë të katalizosh. Mendo për kiminë. Hebrenjve 4:12 thotë se Fjala është e gjallë dhe vepruese. E njëjta Frymë që frymëzoi shkrimtarët e Shkrimit të Shenjtë, të frymëzon edhe ty teksa e lexon atë. Dhe kur Fjala e Gjallë katalizohet nga besimi, ndodh një reagim mbinatyror që fal mëkatin, lehtëson frikën, shëron sëmundjen, frymëzon ide dhe lind ëndrra. (2) “Të gjallërosh” do të thotë edhe të transferosh pronësinë. Mendo për pasuritë e paluajtshme. Nuk mjafton vetëm të nënshkruash një kontratë për një shtëpi; duhet të kryesh edhe aktin përfundimtar të blerjes. Me anë të besimit, ne marrim në zotërim Fjalën dhe Fjala na merr në zotërim ne. Kur Fjala gjallërohet, marrëveshja vuloset. (3) “Të gjallërosh” do të thotë gjithashtu të ngjizësh. Kur Fjala ngjizet, ajo të mbush me mundësi, ndryshon dëshirat e tua, shuan frikërat e tua dhe formon në ty mendjen e Krishtit.
