Përgjigja e Perëndisë ndaj ankthit (2)
19. tetor e diel
“Ejani tek unë, o ju të gjithë të munduar dhe të rënduar dhe unë do t'ju jap çlodhje” Mateu 11:28
Çrregullimet e ankthit janë sëmundja më e përhapur e shëndetit mendor në botë. Kjo nuk ka qënë kurrë pjesë e planit të Perëndisë. Tek Mateu 11:28-29, Jezusi thotë: “Ejani tek unë, o ju të gjithë të munduar dhe të rënduar, dhe unë do t'ju jap çlodhje. Merrni mbi vete zgjedhën time dhe mësoni nga unë, sepse unë jam zemërbutë dhe i përulur nga zemra; dhe ju do të gjeni prehje për shpirtrat tuaj”.
Kur qetë punojnë krahë për krahë në fushë, ata vihen nën një zgjedhë dhe e ndajnë ngarkesën e punës. Këtë do Jezusi që ti të bësh: të punosh nën një zgjedhë me Të. A mund të mendosh për ndonjë njeri tjetër më të mirë me të cilin ta ndash barrën tënde? Të bën të mendosh se pse ne presim kaq gjatë që të pranojmë ofertën e Tij! Ai më pas thotë: “Përveç kësaj mos kërkoni çfarë do të hani ose do të pini, dhe mos jini në merak… Ati juaj e di që ju keni nevojë për to. Kërkoni më parë mbretërinë e Perëndisë dhe të gjitha këto do t'ju jepen si shtesë” (Luka 12:29, 30-31).
Jezusi na jep këndvështrimin e përsosur ndaj jetës. Nuk mund t’i shtosh një ditë jetës tënde duke u shqetësuar, por me siguri mund ta shkurtosh me anë të stresit dhe ankthit. Mendoje pak: zogjtë nuk rrinë në pemë duke u shqetësuar se çfarë do të hanë nesër. Jo, ata këndojnë pa patur shqetësime. Zambakët nuk shqetësohen se si do të rriten ose nëse do të bjerë shi mjaftueshëm sa për të mbijetuar. I gjithë krijimi i Perëndisë, përveç njeriut, nuk ka shqetësime. Dhe meqë Ati yt qiellor kujdeset akoma më shumë për njerëzit e Tij, mund të jesh i sigurit se Ai do të kujdeset për ty.
