Çfarë do të bëjmë në parajsë
13. janar e martë
“Unë do të të vë mbi shumë gjëra” Mateu 25:21
Nëse je një njeri që motivohesh nga qëllimet e caktuara, mendimi për të kaluar përjetësinë duke bërë shumë pak ose asgjë nuk do të të pëlqejë. Por nuk është kështu. Kur të shkojmë në parajsë, Perëndia nuk do të thotë: “Të lumtë shërbëtor i mirë dhe besnik; mund të pushosh për gjithë përjetësinë”. Jo, Ai do të thotë: “Dhe i zoti i tha: ‘Të lumtë, shërbëtor i mirë dhe besnik; ti u tregove besnik në gjëra të vogla, unë do të të vë mbi shumë gjëra; hyr në gëzimin e Zotit tënd’” (Mateu 25:21). Do të ketë “shumë gjëra” për ne për të bërë. Ne e dimë se do të jemi me Krishtin në tokën e re gjatë mbretërimit të Tij mijëvjeçar (Shiko Zbulesa 20:6). Dhe Zbulesa 22:3 thotë: “Shërbëtorët e tij do t'i shërbejnë”. Perëndia jo vetëm që do të ketë një vend për secilin prej nesh, por një plan.
Arsyeja pse parajsa nuk do të jetë e mërzitshme është se Perëndia nuk është i mërzitshëm! Psalmisti ka thënë: “Ka shumë gëzim në praninë tënde; në të djathtën tënde ka kënaqësi në përjetësi” (Psalmi 16:11). Meqë do të jemi në praninë e Perëndisë, çdo gjë që bëjmë do të na japë gëzim dhe kënaqësi. Predikuesit 3:11 thotë se Perëndia ka vënë përjetësinë në zemrat tona. Kjo do të thotë se Perëndia ka krijuar brenda nesh një hapësirë e cila nuk mund të mbushet përveçse me parajsën. Ne nuk mund ta kuptojmë kurrë çdo gjë që Perëndia ka planifikuar për ne në shtëpinë tonë qiellore. Dhe ne nuk mund ta rikrijojmë parajsën në tokë. Por kur zgjedhim të përgatitemi për shtëpinë tonë të përjetshme që po na pret, përqëndrimi ynë tokësor shkon drejt përjetimit të një jete që kënaq dhe nderon Perëndinë dhe i sjell të tjerët tek Ai.
