Ti ke një dhunti që Perëndia mund ta përdorë
11. nëntor e martë
“Duke pasur dhunti të ndryshme sipas hirit që na u dha” Romakëve 12:6
Një pastor shkruan: “Perëndia përdori një aftësi që dukej e parëndësishme për ta përdorur Davidin në mënyrë strategjike. Dhe aftësia e përdorimit të hobes nuk është shembulli i vetëm…Kur Davidi luante harpën, ai i qetësonte shpirtin Saulit [Shiko 1 Samuelit 16:23]. Kështu u takua Davidi me Jonathanin [djalin e mbretit Saul]. Në këtë mënyrë ai mësoi etikën në oborrin e mbretit. Pa aftësitë muzikore, Davidi nuk do të kishte shkelur dot as përpara derës së pallatit mbretëror! Nuk i dihet kurrë se cilën aftësi ka për të përdorur Perëndia për qëllimet e Tij, ndaj mos i nënvlerëso aftësitë e tua.
Perëndia mund të përdorë çdo gjë…për qëllimet e Tij, nëse ne thjesht e lejojmë veten të përdoremi nga Ai. Perëndia përdori aftësinë për ndërtimin e anijeve të Noeut, aftësinë e Jozefit për të interpretuar ëndrrat dhe njohurinë astronomike të dijetarëve. Asnjë aftësi nuk është e padobishme ose e papërdorshme në planin e madh të Perëndisë…Por ja çfarë duhet të shohësh: psalmet më të mira dalin nga rrethanat më të këqija…Psalmet më ngushëlluese u shkruan në situatat më të mundimshme. Davidi po ecën përmes luginës së hijes së vdekjes. Davidi po vuan për shkak të tradhëtisë të tij me Bathshebën. Davidi është arratisur dhe po fshihet në shpellat e Adulamit. Davidi nuk donte të ishte pjesë e këtyre situatave, por ato dhanë fjalët që gjejmë tek Psalmi 23, Psalmi 51 dhe Psalmi 142.
Ndoshta po lufton me depresionin ose po mundohesh nga një gabim që të duket i pafalshëm ose thjesht je lodhur duke qënë i lodhur…Mund mos të të pëlqejnë rrethanat e tua të tanishme, por ato mund të jenë çelësi për rritjen tënde të karakterit. Dhe rritja e karakterit është çelësi drejt së ardhmes tënde”.
