Të forcosh martesën tënde (2)
9. dhjetor e martë
“Duajeni njëri-tjetrin” Romakëve 12:10
Ja pesë mësime të tjera mbi marrëdhëniet nga Jon Gordon: (1) Sa më shumë e dua gruan time, aq më shumë e dua jetën time. Nuk ka të bëjë me atë që bën ajo për mua. Nuk ka të bëjë me mbajtjen e rezultateve. Ka të bëjë me të vendosurit për të qënë vetëmohues, ta duash atë, t’i shërbesh asaj dhe të jesh aty për të. Kur e bëj këtë, që të dy ne bëhemi më mirë. (2) Inkurajo në vend që të konkurrosh. Shumë njerëz bëhen xhelozë kur bashkëshortja e tyre po shijon suksesin në vend që ta inkurajojnë atë. Kur mbështesni dhe përkrahni njëri-tjetrin, ju rriteni individualisht dhe e përforconi skuadrën tuaj.
(3) Mos u dorëzo. Ndonjëherë martesa është e bukur dhe ndonjëherë nuk është. Shumë njerëz heqin dorë, duke menduar se bari është më i gjelbër diku tjetër. Nuk është. Rrënjose veten, përmirësoje marrëdhënien tënde, shpenzo kohë dhe energji tek bashkëshortja jote dhe do të bëhesh ai që duhet të jesh. Në martesë mëson të japësh dhe të marrësh dhe të bësh kompromis, ku të merresh me problemet e tua individuale dhe të shëroheni së bashku. (4) Kini një mision të përbashkët. Gruaja ime dhe unë e dinim se nuk ishim së bashku vetëm për veten tonë. Ne e ndjenim se misioni ynë ishte të rrisnim kampionë, të cilët do të sillnin ndryshim në botë. Ne nuk jemi prindër të përsosur, kemi bërë gabime, por misioni ynë na frymëzoi që të bënim më të mirën tonë – veçanërisht këtë vitin e kaluar me dy adoleshentë dhe një vit të vështirë.
(5) Ftojeni Perëndinë në martesën tuaj. Vite më parë kur ne ishim përballë një pengese të vështirë, dikush më tha se si ai dhe gruaja e tij luteshin së bashku çdo natë. Kështu që, e pyeta Perëndinë se cila duhej të ishte lutja jonë. Më erdhi përgjigja disa ditë më vonë dhe ne jemi lutur çdo natë që atëherë. Kjo gjë ka bërë një ndryshim që çoi drejt faljes, shërimit dhe rritjes.
