Ti je një agjent i pajtimit
10. maj e diel
“Perëndia…na dha shërbimin e pajtimit” 2 Korintasve 5:18
Pali shkroi: “Prandaj nëse dikush është në Krishtin, ai është një krijesë e re; gjërat e vjetra kanë shkuar; ja, të gjitha gjërat u bënë të reja. Edhe të gjitha gjërat janë nga Perëndia që na pajtoi me veten përmes Jezu Krishtit dhe na dha shërbimin i pajtimit, sepse Perëndia e ka pajtuar botën me veten në Krishtin, duke mos ua numëruar njerëzve fajet e tyre dhe vuri ndër ne fjalën e paqtimit. Ne, pra, bëhemi lajmëtarë për Krishtin, sikurse Perëndia të këshillonte nëpërmjet nesh; dhe ne ju këshillojmë juve për hir të Krishtit: Paqtohuni me Perëndinë!” (v. 17-20).
Ndonjëherë reagimi ynë i parë kur mësojmë se një bashkëbesimtar ka rënë në mëkat është të nxitojmë drejt telefonit dhe të themi: “A e dëgjuat?”. Ose të drejtojmë gishtin duke e akuzuar. Ose të distancohemi nga ai person pikërisht në kohën kur ai ose ajo ka nevojë për lutjet, dashurinë dhe mbështetjen tonë. Bibla thotë: “Dhe të keni para së gjithash një dashuri të madhe për njeri tjetrin, sepse ‘dashuria do të mbulojë një shumicë mëkatesh’” (1 Pjetrit 4:8). Nëse i lënduari nuk mund të gjejë mëshirë në familjen e Perëndisë, ku do ta gjejë atë? Në vend që të bashkohesh me ata që ngrenë gishta akuzues, ne duhet të njihemi si ata që shtrijnë dorën e ndihmesës. Jezusi e bëri këtë me Simon Pjetrin: “Satani ka kërkuar t'ju shoshë ashtu siç shoshet gruri. Por unë jam lutur për ty, që besimi yt të mos mpaket; dhe ti, kur të jesh kthyer, forco vëllezërit e tu” (Luka 22:31-32). Ashtu siç Perëndia ka derdhur mbi ty vazhdimisht hirin e Tij kur nuk e ke arritur qëllimin, Ai po të thërret që ta derdhësh të njëjtin hir edhe ndaj të tjerëve.
