Përdor fuqinë e lavdërimit
14. Janar E Martë

‘Lëvdimi i tij do të jetë gjithnjë në gojën time’ Psalmi 34:1 KJV

Ti mund ta lavdërosh Perëndinë shumë pak, por asnjëherë s’do të jetë shumë sa më shumë ta lavdërosh Atë. Davidi shkruan: ‘Nga lindja e diellit deri në perëndim të tij u lëvdoftë emri i Zotit’ (Psalmi 113:3 KJV). ‘Të lëvdoj shtatë herë në ditë’ (Psalmi 119:164 KJV). ‘Lëvdimi i Tij do të jetë gjithnjë në gojën time’. Kur rrethanat të mbysin, gjëja e fundit që mendon se duhet të bësh është të lavdërosh Perëndinë. Por në fakt, ajo është gjëja e parë që duhet të bësh, sepse lavdërimi e heq vëmendjen tënde nga vetja jote dhe e çon tek fuqia mrekullibërëse e Perëndisë. Jozafati u përball me një ushtri, ndaj të cilës nuk kishte asnjë shpresë se do të fitonte. Por kur ai filloi ta lavdëronte Perëndinë, armiqtë e tij shkatërruan njëri-tjetrin ndërsa ai e shihte këtë i mahnitur. Kur Pali dhe Sila lavdëruan Perëndinë në burg, zinxhirët e tyre u thyen dhe dyert u hapën. Është normale të përqëndrohesh tek problemi dhe të harrosh të lavdërosh Peëndinë, por lavdërimi i zgjidh problemet. Pali shkruan: ‘Që prova e besimit tuaj, që është shumë më i çmuar nga ari që prishet, edhe pse provohet me zjarr, të dalë për lëvdim, nder e lavdi në zbulesën e Jezu Krishtit’ (1 Pjetrit 1:7 KJV). Fillo të pranosh fuqinë e lavdërimit dhe të zgjedhësh ta lartësosh Perëndinë pavarësisht se si ndjehesh. Lavdërimi të sjell në praninë e Perëndisë dhe të pozicionon për favorin dhe bekimin e Tij. Ti thua: ‘Por unë nuk e kuptoj se si funksionon lavdërimi’. Mendo për të kështu: ti nuk ke pse të kuptosh aerodinamikat në mënyrë që të fluturosh. Ti thjesht hipën në avion dhe piloti të çon aty ku ke nevojë të shkosh. Është e njëjta gjë kur lavdëron Perëndinë – vetëm bëje dhe do të marrësh rezultatet.