Lutja është lidhja jote me Perëndinë
22. prill e mërkurë
“Ju që i kujtoni Zotit premtimet e tij, mos rrini në heshtje” Isaia 62:6
Peshku remora ka një disk oval thithës në majë të kokës që i lejon të ngjitet në pjesën e poshtme të një peshkaqeni. Pasi ngjitet, remora nuk ka pse të shqetësohet për ushqimin, transportin apo sigurinë. Ushqehet me ushqimin që bie nga goja e peshkaqenit. Sigurisht, ka mundësinë të notojë vetë, por kur vendos të ngjitet te peshkaqeni, shkon aty ku shkon peshkaqeni. Nuk përpiqet të shkojë në një drejtim të kundërt me peshkaqenin. Mbrojtje? Nuk është problem për dikë që është i lidhur me një krijesë kaq të fuqishme. Remora është e sigurt dhe e di që peshkaqeni mund ta çojë në vende ku nuk mund të shkojë kurrë vetëm.
A nuk tingëllon kjo si marrëdhënia që Perëndia dëshiron që fëmijët e Tij të kenë me Të? Ai dëshiron që ne të ushqehemi me fjalët që dalin nga goja e Tij. Ai dëshiron që ne të shkojmë me Të aty ku Ai na udhëheq dhe jo të nisemi në udhëtime të pavarura, duke shpresuar se Ai do të na shoqërojë. Ai dëshiron që ne të jetojmë me sigurinë se Ai do të mbrojë jo vetëm jetën tonë, por edhe marrëdhëniet tona dhe gjithçka që na përket. Oh, sikur të imitonim remorën! Atëherë do të gjenim veten duke siguruar lidhjen tonë me Perëndinë çdo ditë përmes lutjes. Ai po pret të na çojë në vende nga të cilat kemi frikë të shkojmë vetëm. Profeti Isaia i këshilloi udhëheqësit hebrenj: “Lutjuni Perëndisë gjithë ditën dhe gjithë natën për përmbushjen e premtimeve të tij”. Pra, fjala për ju sot është kjo - lutja është lidhja juaj me Perëndinë.
